اوسلو.. آپکی آواز(عقیل قادر)ناروے میں قومی سطح پر مزدوروں کا عالمی دن منانے کا آغاز 1890 میں ناروے کے دارالحکومت اوسلو میں کیا گیا۔جس میں 3600 مزدوروں اور محنت کشوںنے شرکت کی۔ 1919 میں دن میں آٹھ گھنٹے کے کام کو قانونی حیثیت دی گئی جبکہ 1947 میں فرسٹ مئی کو آفیشل چھٹی کا دن قرار دیا گیا۔ ناروے میں فرسٹ مئی کو بڑے جوش و خروش سے منایا جاتا ہے جس میں مختلف ورکرز یونینز ، سیاسی و سماجی تنظیمیںاپنے ممبران کے لیے مختلف جگہوں پر ناشتے کا اہتمام کرتی ہیں اور اسکے بعد ریلیوں کی شکل میں شہر کے مخصوص جگہوں پر جلسوں کا انعقاد کیا جاتا ہے۔ ناروے کی سب سے بڑی لیبر یونین جس کو مقامی زبان میں LO کہا جاتا ہے ان کی ناروے میں ممبران کی تعداد نو لاکھ سے زیادہ ہے۔ فرسٹ مئی کے موقع پر ایل او نے اوسلو میں بہت بڑے اجتماع کا انعقاد کیا جس میں ہزاروں کی تعداد میں مختلف شعبہ ہائے زندگی سے تعلق رکھنے والوں اور مختلف سیاسی جماعتوں کے سپورٹرز اور قائدین نے بھی بھرپور شرکت کی اور اپنے حقوق کے حصول کے لیے مظاہرے بھی کیئے۔ ایل او کی چیئرمین Gerd Kristiansen نے حکومت پر شدید تنقید کی اور کہا کہ ناقص پلاننگ کی وجہ سے بیروزگاری میں روزبروز اضافہ ہوتا جا رہا ہے اور اس اضافے کو روکنے کے لیے ضروری ہے کہ نئی سیاسی لیڈر شپ کا چناﺅ کیا جائے۔ہوٹل اور ریسٹورنٹ برانچ سے تعلق رکھنے والے نمائندوں نے گفتگو کرتے ہوئے کہا کہ ہم چھ ہزار مزدور آٹھ دنوں سے ہڑتال پر ہیں اور ہمارا ایک ہی مطالبہ ہے کہ ہماری تنخواہ اتنی ہو کہ ہم اپنی زندگی بہتر طور پر گذار سکیں۔ فلسطین، ایران ، سری لنکا اور دیگر ممالک سے تعلق رکھنے والے لوگوں نے بھی اپنے حقوق کے لیے پلے کارڈ آویزاں کیے ہوئے تھے اور نارویجن حکام سے مطالبہ کر رہے تھے کہ ان ممالک میں انسانی حقوق کی خلاف ورزیاں بند کرائی جائیں

آپکی آواز۔۔۔اوسلو(عقیل قادر)اوسلو کی سرزمین پر سکھ کمیونٹی کی طرف سے بیساکھی کا دن منایا گیا جس کو مقامی زبان میں ٹربن ڈےکا نام دیا گیا تھا۔پنجاب سے تعلق رکھنے والے لوگ اپنی ثقافت اور مذہب سے جس انداز میں جڑے ہوئے ہیں وہ قابل ستائش ہے۔ بیساکھی کا تہوار ہر سال اپریل کے مہینے میں منایا جاتا ہے اور دنیا بھر میں رہنے والے سکھوں کے لیے انتہائی مقدس سمجھا جاتا ہے جبکہ پنجاب کے کسانوں کے لیے اس تہوار کو خوشی اور مسرت کا پیغام بھی سمجھا جاتا ہے۔ سکھ مذہب کے لوگ بیساکھی کے دن گردواروں میں جمع ہو کر عبادت کرتے ہیں اس دن پیلے رنگ کو خاص اہمیت حاصل ہوتی ہے۔ اوسلو میں تربن ڈے بڑے پیمانے پر سات سالوں سے جو ش و خروش کے ساتھ منایا جا رہا ہے۔ انتظامی ذرائع کے مطابق تربن ڈے میں دس ہزار سے زائد نارویجن شہریوں نے شرکت کی جن میںبہت بڑی تعداد میں لوگوں نے اپنے بچوں کے ہمراہ شرکت کی۔ اس موقع پر مختلف اقسام کے سٹال لگائے گئے تھے جن میں بچوں کے لیے ورکشاپس اور بڑوں کے لیے سکھ مذہب کو جاننے کے لیے اسٹال لگائے گے تھے، کھانے پینے کے سٹال کے علاوہ جہاں پر سب سے زیادہ رش دیکھنے میں آیا وہ سکھ مذہب کے مطابق دستار بندی کے سٹال تھے جہاں پر لوگ گھنٹوں قطار میں کھڑے ہو کر دستاربندی کے لیے انتظار کرتے رہے۔ انتظامیہ کے مطابق اڑھائی ہزار دستاریں لوگوں کے سروں پر باندھی گئی ۔اس دن کی سب سے خاص بات یہ تھی کہ تمام سٹالز پر مفت چیزیں تقسیم کی گئی ۔ اس موقع پر ایک جلوس کا بھی اہتمام کیا گیا جس میں سکھ برادری نے اپنے مخصوص مذہبی لباس میں بھرپور شرکت کی۔ اس تہوار میں شریک ہونے والے مقامی افراد نے اس کو نہایت خوش آئند قرار دیا اور کہا کہ ناروے اب ایک ملٹی کلچرل سوسائٹی میں تبدیل ہو چکا ہے اور یہ انتہائی ضروری ہے کہ ہم کو ایک دوسرے کے کلچر اور مذہب کے بارے میں معلومات حاصل کریں۔

آپکی آواز۔۔۔۔اوسلو(عقیل قادر)منہاج القرآن انٹرنیشنل سپریم کونسل کے چیئرمین ڈاکٹر حسن محی الدین قادری ایک روزہ وزٹ پر ناروے تشریف لائے تو منہاج القرآن اوسلو کے مرکز پر ان کا رفقاءو ممبران کی طرف سے پُرتپاک استقبال کیا گیا اور اس موقع پر ورکرز کنونشن کا انعقاد بھی کیا گیا جس میں خواتین و حضرات نے بھرپور شرکت کی۔ پروگرام کا باقاعدہ آغاز آیات ربانی سے کیا گیا جس کی سعادت قاری انصر علی قادری نے حاصل کی۔ علامہ نور احمد نور، قاری انصر علی قادری، ہارون قیوم اور سعید یسین نے نعت رسول مقبول پیش کی۔ ڈاکٹر حسن محی الدین قادری نے پُرجوش خطاب کرتے ہوئے کہا کہ اللہ پاک کسی کی عبادت کا طالبگار نہیں بلکہ وہ یہ دیکھتا ہے کہ کون ہے جو میری نعمتوں کا شکر ادا کرتا ہے اور ضرورت مندوں کی ضرورت کو پورا کرتا ہے۔ انہوں نے کہا کہ حضور نبی کریم سے محبت کے تقاضے تب ہی پورے ہوں گے جب ہم اسوہ حسنہ پر عمل پیرا ہوں گے۔ انہوں نے مزید کہا کہ ّآج کے پرفتن دور میں منہاج القرآن اللہ کی نعمتوں میں سے ایک نعمت ہے جو شیخ الا سلام ڈاکٹر محمد طاہرالقادری کی قیادت میں پوری دنیا میں اسلام کی خدمت کر رہی ہے۔ ورکرز کنونشن میں سابقہ اور موجودہ انتظامیہ کے ممبران نے بھرپور شرکت کی جن میں ظفر سیال، چوہدری مشتاق احمد، اعجاز وڑائچ، پرویز نثار، میاں اسلم، حاجی منظور احمد، حاجی صدیق ، ارشد نثار، نجم الثاقب، افتخار محمود، شیخ شوکت اور دیگر شامل ہیں۔ پروگرام کی نقابت کے فرائض علامہ اقبال فانی، حافظ صداقت علی اور ناصر علی اعوان نے ادا کیے۔ 

آپکی آواز۔۔اوسلو(عقیل قادر)دنیا بھر کی طرح ناروے میں بھی سانحہ لاہور میں شہید ہونے والوں کی یاد میں تقریبات کا سلسلہ جاری ہے۔ ہیومن سروسز ناروے نے اوسلو میں سانحہ لاہور اور دنیا بھر میں دہشت گردی سے جاں بحق ہو جانے والوں کی یاد میں ایک تقریب کا انعقاد کیا جس میں اوسلو کی مذہبی، سیاسی اور سماجی تنظیمات کے نمائندوں نے بھرپور شرکت کی۔ تقریب کا آغاز مفتی محمد زبیر تبسم نے قرآن پاک کی تلاوت سے کیا جبکہ رسول اکرم کی بارگاہ اقدس میں ہدیہ نعت کی سعادت چوہدری سجاد داد نے حاصل کی۔ تقریب سے چوہدری محمد حسین، اطہر علی، وسیم شہزاد، ڈاکٹر مبشر بنارس، سید سبطین شاہ، میاں صفدر، چوہدری خالد تھتھال، آفتاب وڑائچ ، خالد کسانہ اور چوہدری غلام سرور نے خطاب کیا۔ مقررین نے تقریب سے خطاب کرتے ہوئے پاکستان اور دنیا بھر میں جاری تشدد اور دہشت گردی کی مذمت کرتے ہوئے کہا کہ دہشت گردوں کا کوئی مذہب نہیں، وہ انسانیت اور اسلام کے دشمن ہیں کیونکہ دہشتگرد اسلام کے نام پر کاروائیاں کر کے معصوم اور بے گناہ لوگوں کو قتل کر رہے اور جو اسلام کی بدنامی کا باعث بن رہا ہے۔ مقررین کا مزید کہنا تھا کہ دہشت گردوں کی کاروائیوں سے سب سے زیادہ متاثر یورپ میں بسنے والے مسلمان ہو رہے ہیں اور بالخصوص حجاب استعمال کرنے والی مسلمان خواتین سے امتیازی سلوک کیا جاتا ہے۔ چوہدری غلام سرور کوارڈ ینیٹر ہیومن سروسز اور جنرل سیکریڑی خالد کسانہ نے تقریب میں شرکت کرنے پر تمام احباب کا شکریہ ادا کیا۔ مولانا محبوب الرحمن نے شہدائے لاہور اور دنیا بھرمیں جاں بحق ہونے والوں کے دراجات کی بلندی اور لواحقین کے صبر و جمیل کے لیے خصوصی دعا کی جبکہ دہشتگردی میں جاں بحق ہونے والوں کی یاد میں شمعیں بھی روشن کی گئیں۔تقریب میں شریک شرکاءنے گفتگو کرتے ہوئے دہشتگردی کو اسلام اور انسانیت کا دشمن قرار دیا۔